Plantun de Prouvènço

Pèr coumpara dos planto d'encò nostre

Trigonella gladiata & Panicum barbipulvinatum

Trigonella gladiata

Fabaceae Leguminosae

Noms en français : Trigonelle à fruits en glaive, Trigonelle armée d'épées.

Descripcioun :
Lou fenigrè-fèr dóu gènre Trigonella, la cousino sóuvajo dóu fenigrè, trachis dins li relarg secarous de Prouvènço. Es uno plando pelouso que rebalo au sòu, un pau rougineto. Fai de pichòti flour blanquinouso, mai se recounèis subretout à si dòusso peludo que porton un long be (fotò). Coumpara emé lou fenigrè que ié sèmblo proun, mai qu'èi devengu forço rare au nostre.

Usanço :
Li grano se manjon coume sabourun dins lou miejour dóu Marrò. La planto a bessai li mémis usanço que lou fenigrè.

Port : Erbo
Taio : 5 à 25 cm
Fueio : coumpausado
Tipe bioulougico : Teroufite
Cicle bioulougico : Planto de l'an

Gènre : Trigonella
Famiho : Fabaceae
Famiho classico : Leguminosae

Ordre : Fabales

Coulour de la flour : Blanco
Petalo : irreguliero
Ø (o loungour) flour : 8 à 10 mm
Flourido : Printèms - Estiéu

Sòu : Ca
Autour basso e auto : 0 à 800 m
Aparado : Noun

Liò : Garrigo - Tepiero seco - Roucaio
Estànci : Termoumediterran à Subremediterran
Couroulougi : Estenoumediterrano
Ref. sc. : Trigonella gladiata Steven ex M.Bieb., 1808

Mi(-de-ribeirés)

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.